Hamborgarabúlla Böðvars

– Hvað viltu fá, Abba? spurði Haraldur.
– Ég er ekki svöng, sagði Albertína en rýndi þó aftur ofan í matseðilinn. Henni tókst með naumindum að dylja að henni þótti nokkuð til staðarins koma. Hann minnti á gamla daga sem hún var svo forvitin um. Hér var meira að segja lesefni. Haraldur andvarpaði og pantaði annað tilboð númer fjögur fyrir dóttur sína. Hann vissi sem var að Albertína hafði ótrúlegan áhuga á að lesa allt sem fyrir henni varð. Þannig gat hún algjörlega týnt sér í matseðlinum og misst áhugann á að næra sig.