Þórarinn Leifsson fær barnabókaverðlaun menntaráðs 2010

Þórarinn Leifsson hlaut í dag barnabókaverðlaun menntaráðs Reykjavíkurborgar fyrir Bókasafn ömmu Huldar sem hann jafnframt myndskreytti.Verðlaun fyrir bestu þýðingu barnabókar fær Jón Hallur Stefánsson fyrir bókina Þjófadrengurinn Lee Raven eftir Zizou Corder.

Hanna Birna Kristjánsdóttir borgarstjóri afhenti barnabókaverðlaunin við hátíðlega athöfn í Höfða í dag að viðstöddum fjölmörgum gestum. Meðal þeirra voru sigurvegarar í Stóru upplestrarkeppninni sem lásu upp úr verðlaunabókunum. Þetta er í 38. sinn að yfirvöld menntamála í Reykjavík verðlauna rithöfunda og þýðendur barnabóka fyrir afburða góðar barnabækur í þeim tilgangi að vekja athygli á mikilvægi góðra bókmennta í uppeldisstarfi. Úthlutunarnefnd var að þessu sinni skipuð Þórdísi K. Pétursdóttir formanni, Felix Bergssyni og Lilju Margréti Möller.

Í umsögn dómnefndar um verðlaunabókina Bókasafn ömmu Huldar segir m.a.: „Þórarni Leifssyni hefur tekist að semja vel uppbyggða, frumlega, skemmtilega og ekki síst fræðandi sögu. Bókasafn ömmu Huldar er því vel til þess fallin að auka áhuga barna á lestri góðra bóka.“

Í umsögn um þýðingu barnabókarinnar Þjófadrengurinn Lee Raven segir m.a.: „Jóni Halli hefur tekist einkar vel upp við þýðinguna sem er lipur og á nútímaíslensku. Stíllinn er til fyrirmyndar og sýnir hversu góð tök þýðandi hefur á blæbrigðum íslensks máls.“